B’kawtela, flimkien
L-imxija Covid-19 bidlet ħajjet kull individwu, mhux biss f’pajjiżna biss
iżda wkoll mad-dinja kollha. In-norma tal-jum ma baqgħetx, iżda saret xi ħaġa
tal-passat. Ħafna, inkluż jien, għandna x-xewqa li mill-ġdid din in-norma
terġa’ tirritorna f’qasir żmien, madanakollu nafu li biex dan iseħħ hemm
il-ħtieġa li nagħmlu sagrifiċċju.
Tmexxija serja
Illum qed nibqgħu nbatu l-konsegwenzi tal-messaġġi konfliġenti li kellna
fl-aħħar ġimgħat. In-numri għolja li rajna fl-aħħar ġimgħat huma inkwetanti
ħafna.
Evidenti li ekonomija b'saħħitha, jeħtieġ li jkollha poplu b'saħħtu u bla
tħassib li jista' jimrad. Is-saħħa kellha tkun l-ewwel, is-saħħa u l-ħarsien
tal-poplu għandhom jkunu l-ewwel, biex fl-eventwalità ngawdu lkoll flimkien.
In-numri għolja jeħtieġ li aħna nħarsu lejhom bħala messaġġ ta' kawtela.
Rajna ras iebsa fit-tmexxija. Irridu nirrealizzaw li l-problema ħakmitna iżda
nistgħu negħlbuha jekk nagħmlu moħħna hemm. Ma nifilħux għal aktar messaġġi
konfliġenti minn Robert Abela u minn oħrajn. Irridu s-serjetà fit-tmexxija.
Bħala poplu Malti għamilna ħafna sagrifiċċji. Tal-ħwienet u n-negozji u
kif, ħaddiema fit-turiżmu, il-ħaddiema tas-saħħa u l-frontliners ilhom sena
jissieltu għalina. Il-Gvern lanqas biss tahom żieda ta’ rikonxximent tal-isforzi
li għamlu l-ħaddiema tas-saħħa, b’uħud jgħixu ‘l bogħod mill-familja, talli
l-PM għażel li juża rettorika li ħawdet l-imħuħ u tefgħat aktar piż fuq
is-settur.
F'pajjiż ta' nofs miljun ruħ
l-għoti tal-vaċċin nemmen li għandu jkun mgħaġġel aktar. Kieku t-tobba
tal-familja jingħataw aċċess biex jagħtu l-vaċċin u l-istess fil-bereġ, filwaqt
li jinħolqu ċentri, inkluz ċentri immobbli fil-lokalitajiet, biex il-vaċċin
jingħata b'mod aktar mgħaġġel ma naħsbux li nħaffu l-proċess tat-tilqim?
L-ubbidjenza
Issa aktar minn qatt qabel irridu nobdu l-istruzzjonijiet u l-pariri li jtuna l-Awtoritajiet tas-Saħħa. Ħafna forsi s-sena li għaddiet ħarġu jċapċpu fil-gallariji u twieqi għall-ħaddiema kollha li jaħdmu fis-settur tas-saħħa, u dawk kollha li fl-aħħar sena taw u qed jagħtu servizz eċċelenti lejn il-komunità, il-ħaddiema tal-ordni, sħabi l-ġurnalisti, il-ħaddiema tal-indafa pubblika, il-ħaddiema li jaħdmu fil-ħwienet tal-merċa u s-supermarkets, il-ħaddiema fil-banek u ħafna oħrajn, iżda x’piż għandha ċ-ċapċipa li lkoll ċapaċapna jekk ma nobdux u ma nimxux mal-pariri li qed ningħataw?
Aħna bħala poplu rċevejna messaġġi li jmorru ‘l bogħod mill-pariri tas-saħħa, it-tobba kelmuna u taw l-ideat tagħhom ta’ kif għandna nħarsu lilna nfusna u lil dawk l-aktar għeżież. Kellna messaġġi iżda mill-PM li jħawdu l-imħuħ, konvint imma li aħna bħala poplu għandna nagħrfu x’inhu sewwa. Jeħtieġ li nifhmu li l-virus m’għandux kantunieri, u fejn għandu jsibek se jsibek. Kulħadd huwa responsabbli ta’ għemilu, imma ejja nkunu kawti, u bħala poplu nuru aktar minn qatt qabel li aħna maturi u lesti nieħdu aħna l-prekawzjonijiet meħtieġa, anki jekk it-tmexxija ta’ pajjiżna ilha x-xhur tirrepeti messaġġi li f’waqtiet ma jagħmlux sens.
Bħala nazzjon diġà tlifna l-ħajjiet fil-ġlieda kontra din l-imxija, irridu nitilfu aktar biex nitgħallmu?
L-isfidi li saħħet l-imxija
Il-kambjament li qed insemmi huwa ta’ piż kbir fuq bosta li jagħmlu parti mill-ewwel distrett. Mill-kuntatt li qed ikolli mar-residenti bosta qaluli li żdiedu l-każijiet ta’ individwi li jiddejnu biex ilaħħqu mal-ispejjeż tal-ħajja, speċjalment il-kera, filwaqt li l-anzjani u dawk vulnerabbli sabu ma wiċċhom il-karba tas-solitudni u l-ansjetà. Filfatt huwa mbassar li s-settur tas-saħħa mentali fix-xhur li ġejjin se jkun strumentali biex il-poplu Malti jirkupra mill-impatt ta’ din il-pandemija.
Meta nitkellem iżda fuq dan is-settur ma nistax ma nistaqsix: X’investiment sar fl-aħħar snin f’dan is-settur tant u tant kruċjali biex wara kollox ikun jista’ jservi l-ħtiġijiet tal-Maltin? Ilkoll nafu li ma sar kważi xejn f’dan l-ambitu, u s-settur tas-saħħa mentali qabel l-imxija tal-Covid kien diġà fuq sieq waħda... issa b’aktar żieda fin-numru tal-pazjenti li qed ifitxxu l-għajnuna, il-possibbiltà li l-piż jiżdied hija waħda kbira. Piż li se jkompli jżid mal-ħafna xogħol li qed ikollhom il-professjonisti tas-saħħa li fl-aħħar xhur kienu fuq quddiem nett biex bħala nazzjon iġġelidna l-imxija.
Din hija sitwazzjoni reali li qed tkompli żżid mal-problemi kurrenti, dan apparti li ħafna minħabba l-imxija tilfu l-impjieg, jew tilfu ammont sostanzjali mid-dħul finanzjarju tagħhom. Ċifri tal-NSO wrew li l-qagħad f’pajjiżna żdied u kważi laħaq it-13,000 persuna, b’numru sostanzjali jkunu wkoll żgħażagħ u dawk li jkunu se jibdew familja ġdida.
Ħbieb issa l-mument li nuru xi nsarfu vera bħala nazzjon. Flimkien ejja nagħtu s-sostenn 'il xulxin biex ma naqgħux fis-solitudni u jalla anki meta l-affarjiet jaqilbu għall-aħjar, nibqgħu nieħdu ħsieb lil kull min hu fil-bżonn.
Ejja nużaw il-pjattaformi
tal-midja soċjali favurina. Ejja nużawhom biex nitfgħu tbissima fuq fomm
xulxin. Iżda ejja nkunu dixxiplinati li nobdu wara kollox il-pariri li
jingħataw mill-esperti tas-saħħa. B’hekk biss, b’dan il-mod aħna nistgħu
negħlbu din l-isfida li għandna quddiemna, din il-battalja kontra għadu li ma
nafux fejn jinsab, iżda nafu li jinsab fostna.
Ikun ta’ pjaċir jekk xi ħadd
ikun jixtieq li jkellimni ma jiddejjaq xejn jikkuntajani fuq
jamesaaronellul@gmail,com. Dejjem sabiħ meta naqsmu il-ħsibijiet tagħna
flimkien.
Kandidat fuq l-1 Distrett
Comments
Post a Comment