Hija rebħa?
“Rispett”, “diċenża”, “attitudni xierqa”. Dawn huma ftit mill-kliem jew
frażijiet li ġew f’moħħi fl-aħħar jiem b’reazzjoni għal numru ta’ episodji li
għaddiet minnhom il-Floriana. Il-problema li qabel dawn il-kliem, se jkolli
nżid nuqqas; “nuqqas ta’ rispett”, “nuqqas ta’ diċenza”, “nuqqas ta’ attitudni
xierqa”.
L-episodji tal-ġimgħa
Din il-ġimgħa l-ħidma fil-lokal tal-Floriana kienet iddominata minn
attività tal-massa oħra, waħda mill-ħafna li issa saret qisha prassi ta’ kull
sena li l-Fosos tal-Floriana u l-madwar jilqgħu fi ħdanhom eluf ta’ nies għal
attivitajiet u kunċerti diversi. Tajjeb li jkollna attivitajiet. Fl-akbar
pjazza f’Malta tajjeb li jkollna attivitajiet li jlaqqgħu lin-nies.
Fid-dizzjunarju tiegħu, Joseph Aquilina jagħti t-tifsira ta’ pjazza: “medda ta'
art miftuħa użata bħala ġnien jew għar-rikreazzjoni”.
Il-problema li fil-pjazza u l-madwar mhux qed nibqgħu b’din id-defenizzjoni,
għax ir-rikreazzjoni qed twassal biex ikun hemm inkonvenjenza. L-episodju li
leħaq iċ-ċirassa fuq il-kejk, hekk kif ħafna raw anki fuq il-mezzi soċjali,
ritratt ta’ numru ta’ mobile toilets quddiem il-knisja, bi ftit metri jifirdu dawn
il-latrini minn mal-knisja Arċipretali. (ritratt)
Wara li dan kollu żvelajtu fuq il-midja soċjali. Wara għaqda sħiħa
Furjaniża għal dan il-messaġġ, dawn tneħħew minn quddiem il-knisja, għajr 3
f’ġenb ftit ‘il fuq bl-isfond ikun iz-zuntier. L-oħrajn faċċata mal-Fosos u
l-oħrajn mifruxa. Rebħa żgħira? Inqisha bħala avvanz. Ir-rebħa tkun meta
l-Gvern iwieġeb għat-talba tiegħi, għat-talba tal-Furjaniżi biex il-Fosos ikollhom
entità li tħares din il-pjazza nazzjonali.
Din l-attitudni ma tixraqx
fl-ebda qalba tal-lokal. Il-Floriana ma tistax tibqa' tkun użata b'dan il-mod.
Bla rispett, bla diċenza. Attitudni bħal din ma tixraq imkien.
X’ħarsien jeħtieġ?
6 snin ilu,
permezz ta' mozzjoni li preżentajt fil-Kunsill Lokali tal-Floriana tlabt biex
bħala Furjaniżi nħarsu l-pjazez tagħna, fosthom il-Fosos. Is-sitwazzjoni hija
allarmanti. Wara kważi kull attività tal-massa, l-akbar pjazza f'Malta tibqa'
taffaċċja tkissir u ħsarat kbar, bid-detriment fuq dan il-wirt storiku jibqa'
jikber u jikber.
Mil-laqgħat li
saru, li ma kinux xi ħafna, f'sitt snin għadna ma wasalna mkien,
bir-responsabbiltà tal-Fosos ma hi ta' ħadd.
Il-Fosos jeħtieġ
li jkun protett. Fit-8 snin li ili fil-Kunsill Lokali tal-Floriana, qatt ma
rajt risk assesment wieħed qabel attività li ssir fuq il-Fosos. Fl-aħħar laqgħa
qajjimt dan il-punt mill-ġdid, u tennejt u saqsejt jekk dak li qed jitolbu
l-pulizija huwiex biżejjed għall-ħarsien. Il-ħsarat qed isiru kontinwament, u
faċli tasal għall-konklużjoni li l-periklu qed jiżdied mhux jonqos. (Ritratt)
L-għan
tal-mozzjoni ta' sitt snin ilu kien biex il-Fosos ikun protett. Allura jew
il-Gvern jasal jagħti l-fondi meħtieġa biex l-Kunsill ikun jista' jħares sewwa
din il-pjazza, jew jagħti r-responsabbiltà lil entità biex taqdi din
il-funzjoni.
Illum qed naraw forti, mużewijiet u għadd ta' binjiet storiċi li għandhom
ġurisdizzjoni ta' entità, il-Fosos x'għandu anqas?
L-appell se jibqa'
mtenni u sostnut, minni u minn bosta Furjaniżi, il-wirt storiku Furjaniż u dak
nazzjonali fil-Floriana jrid jingħata attenzjoni. Qed nibqgħu naraw attitudni
ta' passività kbira mill-Gvern fil-konfront tal-lokal tagħna. Dan jeħtieġ
jinbidel, dan għandu jinbidel. Se nibqa' naħdem biex il-Floriana tieħu l-ħajja,
ikollha l-għodda xierqa biex tieħu ħsieb tagħha nnifsiha u tingħata
l-attenzjoni kollha li tixraq.
Sajf ta’ inkonvenjenza
Din hi r-realtà. Ma kull attività, jibdew jittieħdu l-parkeġġi. F’waqtiet
il-Furjaniżi nkunu notifikati b’sempliċi karta li nsibu mal-ħajt.
Problema għal aċċess.
It-toroq magħluqa, u mhux l-ewwel darba li l-Furjaniż ikollu jilletika ma’
uffiċjal biex jidħol f’daru.
Ġonna magħluqa bil-barriers. Ġnien il-Mall b’mod partikolari fl-aħħar jiem
għamel 3 iljieli magħluq, maqsum min-nofs bil-barrikati. (Ritratt)
Problema ta’ skart. Problema ta’ iġenè. Problema ta’ storbju, mhux biss
fis-serata, imma anki fit-taħriġ jew waqt it-‘testing tas-sound’.
Dawn huma ftit mill-ħafna inkonvenjenza li ma’ kull attività aħna qed
insofru.
Il-ġejjieni
Fil-laqgħa tal-Kunsill ta’ Mejju rrimarkajt li għandna staġun ieħor ippakkjat bl-attivitajiet kontinwi fuq il-Fosos u l-madwar. Biss biss fuq il-Fosos f'temp ta' 4 xhur se nkunu rajna 8 attivitajiet. Proponejt biex il-Kunsill jibda jitlob lill-entitajiet li qed jorganizzaw dawn l-attivitajiet sabiex jibdew jagħtu forma ta' kumpens li wara jkun investit fil-lokal u r-resident.
Il-Floriana ma tistax tibqa' tilqa' dan kollu mingħajr ma tieħu xejn lura,
jew biex inkunu korretti fuq il-karta, tieħu ftit li xejn. Kif ili nsostni minn
mindu ġejt elett fl-2015, jeħtieġ bilanċ, jeħtieġ investiment xieraq fil-qalb,
fl-identità. Jekk l-awtoritajiet jaħsbu li għax tagħmel kunċert qed tqajjem
lokal, mela żbaljati u tridu tiltaqgħu mal-Furjaniżi biex tifhmu xi ħtiġijiet
jeħtieġ. Il-Floriana għandha ħtiġijiet aktar serji. Kif ili nsostni, flimkien
ma’ oħrajn, il-Floriana tinsab fuq il-magni.
Fil-passat tkellimt fuq inċentivi li jixraq li jkollhom il-Furjaniżi. Pjan
xieraq ta’ riġenerazzjoni. Pjan biex naraw aktar familji. Biex il-Floriana
tieħu l-ħajja fil-komunità li tagħmilha. Dan il-pjan jissokta u aktar ‘il
quddiem bħal ma tajna l-pjan tagħna, se nkunu qed nagħtu l-pjan tagħna biex
il-Floriana jkollha kemm preżent u anki ġejjieni.
James Aaron Ellul
Minority Leader - Floriana
Comments
Post a Comment