Skiet li jtarrax dwar il-Fosos
Responsabbiltà li qatt ma ġiet fdata
Silenzju li l-Gvern jipprova jtaffih bi ftit laqgħat u emails li iżda ftit li xejn ikunu mwieġba. L-appelli tal-Furjaniżi, bi sfortuna, mhux ikunu stmati mill-Ministru tal-Kultura Owen Bonnici. Is-sitwazzjoni ta' fuq il-Fosos, issa ilha għaddejja numru ta' snin, b'numru ta' snin ta' stennija, bil-Fosos u s-sitwazzjoni tibqa' tmur lura u l-pjazza tibqa' tiddeterjora.
6 snin ta' stennija
6 snin ilu, permezz ta' mozzjoni li preżentajt fil-Kunsill Lokali tal-Floriana tlabt biex bħala Furjaniżi nħarsu l-pjazez tagħna, fosthom il-Fosos. Is-sitwazzjoni hija allarmanti. Wara kważi kull attività tal-massa, l-akbar pjazza f'Malta tibqa' taffaċċja tkissir u ħsarat kbar, bid-detriment fuq dan il-wirt storiku jibqa' jikber u jikber.
Mil-laqgħat li saru, li ma kinux xi ħafna, f'sitt
snin għadna ma wasalna mkien, bir-responsabbiltà tal-Fosos ma hi ta'
ħadd.
Ħadd mhu responabbli mill-Fosos
Is-sitwazzjoni hija din, preżentament ħadd mhu responsabbli mill-Fosos. Il-Kunsill m'għandux ġurisdizzjoni ta' din il-pjazza, l-ebda entità ma għandha ġurisdizzjoni, l-ebda entità ma hi responsabbli u għalhekk is-sitwazzjoni qed tibqa' tmur lura. Ħadd mhu responsabbli minn din il-pjazza nazzjonali.
Fl-aħħar laqgħa tal-Kunsill mill-ġdid appellajt dan
kollu, xi ħaġa li ili ntenni għal dawn l-aħħar snin. Il-Kunsill jinsab vuċi
waħda wkoll. Jeħtieġ li l-Fosos ikunu mħarsa, u jkun hemm entità li hija
responsabbli.
Ħsarat kontinwi
L-isfidi kurrenti huma dawn. La ħadd mhu
responsabbli, kulħadd jagħmel li jrid. Fuq il-Fosos hemm żewġ fanali
ornamentali li ntilfu, għosfru, ħadd ma jaf fejnhom. Lura fl-2020 kont ġbidt
l-attenzjoni dwar dan, u t-tfittxija tagħhom għadha għaddejja sal-lum. Ħadd mhu
responsabbli minn dan l-għibien. Riċenti kellna sitwazzjoni oħra li titratta
l-fanali hekk kif għall-ftuħ u l-għeluq tal-Logħob tal-Pajjiżi ż-Żgħar, inqala
fanal, u tpoġġa f'masġar ċkejken li jinsab wara l-monument tal-Vilhena.
Apparti dan kollu, kif jixhdu anki r-ritratti, hemm
fosos li jinsabu mifqugħa, u vvandalizzati, bil-ħsarat ikomplu jiżdied għax
xogħol ta' manutenzjoni fuqhom mhux ikun hemm.
𝐀𝐤𝐭𝐚𝐫 𝐠ħ𝐚𝐣𝐧𝐮𝐧𝐚 𝐥𝐢𝐥𝐥-𝐊𝐮𝐧𝐬𝐢𝐥𝐥 𝐮 𝐥𝐢𝐫-𝐫𝐞𝐬𝐢𝐝𝐞𝐧𝐭𝐢
𝑁𝑖𝑛𝑠𝑖𝑠𝑡𝑢 𝑔ħ𝑎𝑙 𝑘𝑜𝑛𝑡𝑟𝑖𝑏𝑢𝑧𝑧𝑗𝑜𝑛𝑖 𝑙𝑖 𝑡𝑤𝑎𝑠𝑠𝑎𝑙 𝑔ħ𝑎𝑙 𝑖𝑛𝑣𝑒𝑠𝑡𝑖𝑚𝑒𝑛𝑡
Fil-laqgħa tal-Kunsill ta’ Mejju rrimarkajt li għandna staġun ieħor ippakkjat bl-attivitajiet kontinwi fuq il-Fosos u l-madwar. Biss biss fuq il-Fosos f'temp ta' 4 xhur se nkunu qed naraw 8 attivitajiet. Attivitajiet li lkoll iġibu ammont kbir ta' nies, bi problemi ta' storbju, parkeġġ u skart fost l-oħrajn.
Proponejt biex il-Kunsill jibda jitlob
lill-entitajiet li qed jorganizzaw dawn l-attivitajiet sabiex jibdew jagħtu
forma ta' kumpens li wara jkun investit fil-lokal u r-resident.
X'qed nipproponu?
Il-Fosos jeħtieġ li jkun protett. Fit-8 snin li ili fil-Kunsill Lokali tal-Floriana, qatt ma rajt risk assesment wieħed qabel attività li ssir fuq il-Fosos. Fl-aħħar laqgħa qajjimt dan il-punt mill-ġdid, u tennejt u saqsejt jekk dak li qed jitolbu l-pulizija huwiex biżejjed għall-ħarsien. Il-ħsarat qed isiru kontinwament, u faċli tasal għall-konklużjoni li l-periklu qed jiżdied mhux jonqos.
L-għan tal-mozzjoni ta' sitt snin ilu kien biex
il-Fosos ikun protett. Allura jew il-Gvern jasal jagħti l-fondi meħtieġa biex
l-Kunsill ikun jista' jħares sewwa din il-pjazza, jew jagħti r-responsabbiltà
lil entità biex taqdi din il-funzjoni.
Illum qed naraw forti, mużewijiet u għadd ta' binjiet storiċi li għandhom
ġurisdizzjoni ta' entità, il-Fosos x'għandu anqas?
L-appell se jibqa' mtenni u sostnut, minni u minn
bosta Furjaniżi, il-wirt storiku Furjaniż u dak nazzjonali fil-Floriana jrid
jingħata attenzjoni. Qed nibqgħu naraw attitudni ta' passività kbira mill-Gvern
fil-konfront tal-lokal tagħna. Dan jeħtieġ jinbidel, dan għandu jinbidel. Se
nibqa' naħdem biex il-Floriana tieħu l-ħajja, ikollha l-għodda xierqa biex
tieħu ħsieb tagħha nnifsiha u tingħata l-attenzjoni kollha li tixraq.
Artiklu li deher fuq il-mument tat-18 ta' Ġunju 2023
Comments
Post a Comment