X'diskussjoni?
Artiklu li deher fuq in-Nazzjon tal-14 ta' Diċembru, 2022
L-emenda ta' Robert Abela li qed tippermetti li f'Malta jiħdol baxx baxx
l-abort iddominat id-diskussjoni f'bosta fora f'pajjiżna. Emenda fil-liġi li
rnexxielha ġġib flimkien nies b'ideoloġiji politiċi, ta’ fidi differenti
flimkien. Emenda li rnexxielha toħroġ il-massa fit-toroq bħala protesta
għall-mod kif inhi miktuba.
Fi ftit kliem li għadni kemm ktibt, indikajt dikussjoni f'numru ta' fora,
iżda l-fora tal-esperti kemm ingħatat widen qabel tressqet din l-emenda? Xi
ħaġa li issa drajniha, sfortuna. Xi ħadd pespes f'widnejn Abela u mingħajr
konsultazzjoni tressqet din l-emenda. Il-problema hi li diskussjoni ħielsa dwar
dan ma saritx.
Abela b'mod grandjuż, irnexxielu jgħaqqad ukoll lill-NGO's, entitajiet
diversi, esperti, akkademiċi, tobba, għax jekk forsi qed iħarsu lejn l-emenda
minn lenti differenti, kulħadd qed jaqbel li din l-emenda se tkun qed iddaħħal
l-abort f'pajjiżna.
Il-problema iżda li bosta qed jaraw, hija li għal xi raġuni, Robert Abela
għażel li ma jiddiskuti ma ħadd, jew għażel hu ma’ min jiddiskuti, u lill dawk
li jaħdmu fis-settur ma ġewx ikkonsultati. Dan filwaqt li qed jibqa’ jsostni li
din l-emenda mhux se tkun qed iddaħħal l-abort.
Fl-aħħar jiem kellna stqarrija mit-Tobba, il-MAM li qalulu ċar u tond, jekk
trid iddaħħal l-abort, dan tagħmlux f’isem it-tobba. Dawn qalu li l-emenda se
twassal biex jikbru l-problemi għat-tobba għax il-kliem ta’ din il-liġi huma
wisq vagi.
Il-Gvern b’din l-emenda qed jgħid li l-emenda fil-liġi li mhux se tkun qed
iddaħħal l-abort, u li din il-liġi se tkun qed tipproteġi t-tobba, madanakollu
t-tobba issa qed jgħidu li din l-emenda ma jriduhiex.
Din l-emenda ġabet magħha dubji kbar, nuqqas ta’ ċarezza, inċertezza. Malta
se jidħol l-abort? Il-kelma saħħa fl-emenda hija wiesgħa, u hawn mhux biss qed
nifhem u nemmen li l-kelma hija wiesgħa, iżda dan qaluh ukoll għadd ta’ esperti
li jaħdmu ferm viċin aktar is-settur tas-saħħa.
Din it-tema iżda hija tema li tikkonċerna lil kulħadd. U għalhekk ħarġu
n-nies fit-toroq, għax it-tema tikkonċerna lil kulħadd, u l-emenda għandha
tħares lil kulħadd. L-emenda kif inhi se tkun qed tippermetti li tinqatel
it-tarbija fil-ġuf sa disa’ xhur tqala. Tarbija. La embrijun u lanqas fetu,
iżda tarbija.
L-esperti tajjeb li jkollhom lil min iħarishom iżda rridu naħdmu biex
l-abbozz vera jħares lill-omm, lit-tarbija fil-ġuf u lill-mediku
Din l-emenda qisha qed titfa’ dawl li t-tobba f’każijiet fil-passat ma
ħadmux kif suppost. Iżda evidenti, hekk kif rajna anki fl-argument tal-Avukat
tal-Istat dwar il-każ ta’ Prudente, li t-tobba għamlu kollox biex jimxu sewwa,
biex iħarsu l-ħajja.
L-abort qatt mhu ġustifikat li
jsir, speċjalment meta jkun hemm persuni li qed ibatu mis-saħħa mentali u dan
qaluh esperti f’dan il-qasam.
Saqsejt fl-aħħar jiem, dwar jekk dawn l-entitajiet li qed jgħidu li Abela
se jkun qed idaħħal l-abort f’pajjiżna, jekk dawn hux jigdbu, bil-Prim Ministru
jonqos milli jwieġeb.
Sħabi fakkruh li Robert Abela m’għandux mandat biex idaħħal l-abort
f’Malta, iżda evidenti li din id-deċizjoni, din l-emenda, se tkun qed iddaħħal
l-abort.
Jeħtieġ li naġixxu, jeħtieġ li jekk issir emenda, tkun qed tħares lil
kulħadd, lill-omm, lill-mediku u lit-tarbija fil-ġuf. Jeħtieġ aktar ħidma ta’
għarfien, jeħtieġ aktar ħidma biex tingħata l-għajnuna fejn ikun meħtieġ iżda
żgur li bl-emenda li se ssir m’għandna qatt nippermettu li nitilfu l-ħajjiet,
la tal-omm u lanqas tat-tarbija.
Comments
Post a Comment