Għani fl-identità, fqir fil-ġustizzja soċjali
Kommess li naħdem għall-Ewwel Distrett
Bir-realtajiet li qed inħabbtu
wiċċna magħhom ma nistgħux nibqgħu siekta. Irridu nitkellmu biex jiżdied l-għarfien
dwar l-isfidi li hawn fl-Ewwel Distrett, iżda wkoll noffru wkoll
is-soluzzjonijiet biex dawn l-isfidi nagħmluhom opportunitajiet biex ntejbu
ħajjitna.
Kif indikajt fid-diskors li
wassalt il-Ħadd li għadda f’Birkirkara, bi kburija jien kandidat f’isem il-PN, kburi li għandi l-privileġġ li
nservi lill-poplu Malti u Għawdxi kollu, iżda b’mod partikolari se nkun qed
nirrapreżenta lin-nies tal-ewwel distrett, iċ-ċentru ta’ pajjiżna. Id-distrett
tal-Belt Valletta, il-Floriana, il-Ħamrun, il-Marsa, Santa Venera, Tal-Pietà u
Gwardamangia.
Illum iżda x’sar minnu dan id-distrett
li hu l-benniena tal-istituzzjonijiet, tal-Gvern, tat-tmexxija? Xi sfidi qed
insibu aħna r-residenti tal-Ewwel distrett? Nistħajjel li ħafna jgħidu la
ninsabu daqshekk viċin it-tmexxija ta’ pajjiżna, kollox miexi fuq ir-rubini,
iżda sfortunatament is-sitwazzjoni mhux hekk.
·
Ftit ‘il fuq
mill-Parlament, tinżel fil-qalb tal-Kapitali, u f’numru ta’ lokalitajiet oħra
fil-madwar, hemm familji li mhux ilaħħqu mal-għoli tal-ħajja, mal-kera, b’uħud
minnhom ma jafux jekk hux se jispiċċaw
barra fit-triq. Uħud sa anki jħallsu kera ta’ mijiet, għal 3 ikmamar, li biex
tasal għalihom trid titla’ 4 sulari taraġ.
·
Tmur
fil-Floriana u ssib nies li għandhom il-kċejjen tagħhom fil-kantini, qalb
l-umdità, u f’waqtiet ikunu esposti għat-tniġġis tal-vetturi, u mill-ġdid
iħallsu kera ta’ mijiet fix-xahar. Dan mhux biss qed ngħidu fuq esperjenzi li
għext, iżda fl-aħħar jiem studju tal-Caritas wera li familja medja ma tistax
tlaħħaq mal-ispejjez ta’ ħajja bażika u diċenti.
·
Immorru
fil-Ħamrun, il-Marsa,Tal-Pietà u G’Mangia, nsibu lil dik il-mara, lil dawk
l-anzjani li filgħaxija qed jibżgħu joħroġu minn djarhom għax mhux iħossuhom
sikuri, bil-korp tal-pulizija mifni jipprova jagħmel minn kollox biex iħares
liċ-ċittadin, iżda m’għandux risorżi biżejjed.
·
L-istess
lokalitajiet li semmejt huma mifnija bit-tniġġis fl-arja, bil-pulmun tagħhom
mifni bi problemi tal-ażma, bil-Gvern jitratieni biex isaqqaf u jħaddar Triq
Reġjonali f’Santa Venera u ma jlissen l-ebda kelma dwar il-problema ta’ parkeġġ
li hawn f’dawn il-lokalitajiet rispettivi.
Dawn huma uħud mill-ħafna sfidi li
aħna qed insibu ma’ wiċċna, dan huwa
l-faqar moħbi, l-inġustizzji li qed isiru fis-silenzju tal-medda taż-żmien.
B’dieqa kbira ntenni iżda li din
l-identità f’waqtiet qed tingħata bis-sieq bil-Belt, il-Floriana, il-Ħamrun u
l-Marsa li qed iħabbtu ma’ wiċċhom problemi ta’ riġenerazzjoni, b’nuqqas ta’
familji, nuqqas ta’ wlied li jġorru magħhom l-identità. Nistħajjel ngħid li uħud
mil-lokalitajiet kważi jinsabu fuq il-magni tal-mewt b’binjiet vojta u
abbandunati. L-istess huma abbandunati
l-anzjani tagħna, bid-distrett kull ma jmur qed ikollu populazzjoni li qed tixjieħ,
iżda l-Gvern joffri biss dar waħda tal-anzjani.
Il-politika tal-PN hija waħda
favur ambjent aħjar, ambjent nadif....
·
Iva il-PN
jaqbel li Triq Sant’Anna ssir ġnien... u fil-manifest tal-Partit Nazzjonalista
għall-aħħar elezzjoni tal-Kunsill fil-Floriana, wara tfassil li sar minni u
mill-Kunsilliera sħabi, il-Partit indika b’mod ċar li jeħtieġ li Triq Sant’Anna
tingħata l-attenzjoni li ilha s-snin ma jkollha. Iżda nħeġġeġ, li għal proġetti
bħal dawn issir konsultazzjoni, ma dawk kollha konċernati.
·
Iva l-PN irid
li l-Masġar tal-Ġublew, wara mozzjoni li ressaqt fil-Kunsill, u kien hemm qbil
unanimu, dan il-masġar ikun imħares bix-xieraq u jagħti nifs ġdid lil dan
l-ewwel distrett, masġar f’nofs il-bini urban.
·
Iva l-PN irid
li Triq Reġjonali f’Santa Venera tkun imsaqqfa, u ssir ġnien. U dan il-proġett
żgur se jeleva u jsolvi ħafna problemi tal-madwar....
·
Iva l-PN kien
dak li beda s-servizz tal-Park and Ride, imma issa jeħtieġ li jsir tisħiħ
fis-servizz tal-Park & Ride biex il-problema ta’ parkeġġ fil-Belt u
l-Floriana u l-madwar tittaffa....
Il-PN huwa partit li qed jilqa’ u
jixpruna l-ideat taż-żgħażagħ, iżda aħna ż-żgħażagħ wkoll qed isibu sfidi kbar
quddiem wiċċna, b’għajnuna limitata ħafna għal dawk li jkunu se jixtru l-ewwel
dar tagħhom, u b’anqas għajnuna lil dawk li se jkunu qed jixtru f’dan l-ewwel distrett.
·
Jeħtieġ li
jkun hemm sussidji addizzjonali għal dawk il-familji li jridu jixtru,
jirritornaw f’dawn il-lokalitajiet tal-1 Distrett u din l-idea se nibqa’
nsostniha fl-istrutturi tal-Partit biex tkun xprunata u anki parti
mill-programm elettorali tagħna.
Smajna wkoll fuq kif il-Gvern qed
jimxi b’linja dritta ma' kulħadd, iżda ilkoll nafu li dan mhux qed isir.
·
Jeħtieġ li
l-awtoritajiet ma jimxux b’riga differenti mas-sidien tar-ristoranti u
l-ħwienet, li għax tfaħħar il-Gvern intik u għax toqgħod sieket intik bis-sieq.
·
Jeħtieġ li ngħinu
wkoll lin-negozji li jinsabu f’zoni li llum m’għadhomx daqshekk frekwentati
nieħu minn uħud mill-ħwienet fil-Belt Valletta u l-Ħamrun, fejn qabel
il-kummerċ kien jispikka f’dawn iż-żewġ lokalitajiet, illum iżda minħabba ħafna
ċirkustanzi dan naqas. Irridu ngħinu r- rota tal-ħsieb tan-negozji biex
jirnexxu aktar u aktar, u wara kollox isalvaw lilhom infushom u lil dawk kollha
li jaħdmu magħhom.
·
Jeħtieġ li
ngħinu lill-Kunsilli Lokali biex ikollhom l-għodda biex jaħdmu u jservu wkoll
bħala ċentru edukattiv.
Huwa evidenti li pajjiżna jeħtieġ
bidla fit-tmexxija. Pajjiżna jeħtieġ politika nadifa. Pajjiżna jeħtieġ politika
ta’ fejda li tħares lejn kulħadd l-istess.
Issa jmiss li l-PN jwieġeb
lill-karba tal-poplu jeħtieġ li niltaqgħu man-nies, nisimgħu, nitgħallmu u
mis-smiegħ infasslu proposti konkreti għal futur. Diġà bdejna noħorġu u
niddiskutu l-ideat tagħna ma’ dawk kollha li qed jingħaqdu magħna, imma dan
irridu nkompluh u dan se nkomplu nagħmluh.
Irridu nżommu f’rasna l-għeruq
tal-politika Maltija, dak li jagħmilna lkoll, irridu li n-nies iħossu
s-sentiment li l-politika tagħna hija tagħhom, u mhux għalihom. B’hekk biss il-politika
Nazzjonalista tkun tassew qed titwettaq, tkun tassew qed isservi u taqdi.
Comments
Post a Comment