Is-saħħa tas-soċjetà titkejjel mill-progress ta' dawk l-aktar dgħajfa
F’soċjetà Maltija sinjura u għanja bi tradizzjoni, b’qalb
li tħabbat is-sentiment tal-komunità li tagħmel parti, li tul l-mixja tagħhom
tlaqqahom ma’ bosta esperjenzi għandna ġens li f’waqtiet qed jitpoġġa f’salib
it-toroq. Fil-mixja tiegħi ta’ kuljum qed niltaqa’ ma’ ħafna ġejjin minn
irkejjen differenti tas-soċjetà, ilkoll għandhom warajhom xi rakkont li
jagħmilhom dak li huma, ilkoll għandhom is-suċċessi tagħhom, id-dispjaċir u
t-tbatija tagħhom.
X’qed
nesperjenzaw?
Akkost dan kollu huma l-bosta li jiftħu qalbhom dwar
l-isfidi li llum qed jiltaqgħu magħhom b’kawża tas-sitwazzjoni kurrenti. Ħanut
fil-Ħamrun jgħidli li hu miexi tajjeb u n-negozju tiegħu ma kienx affetwat
bis-sitwazzjoni preżenti, iżda ibnu tilef l-impjieg tiegħu tas-sajf, għax
qalulu li ma kienx hemm bżonnu. Ibnu kien għadu kemm xtara karozza u issa l-loan qed iħallisilu missieru.
Storja oħra teħodna fil-Belt Valletta, b’ħanut li ħa
daqqa minħabba l-kwistjoni politika f’Novembru u Diċembru u fi żmien il-Milied
m’għamilx flus daqs is-soltu, is-sitwazzjoni
kompliet tmur għall-agħar bil-Covid, sfurzat li jnaqqas il-pagi, iżda għamel
mezz li jżomm lill-impjegati tiegħu. Qalli dawn għandhom il-familji, li kien
lest jagħmel sagrifiċċju hu, flimkien mal-ħaddiema biex kulħadd jerfa’ biċċa
mit-tbatija.
Is-soċjetà Maltija fil-maġġoranza tagħha għandha valuri
sodi, u nafu nħennu għal dak li jkun, iżda meta ngħidu progress, x’iġifieri?
Ikun progress jekk jien imxejt u ta’ madwari le? F’kuntest ta’ nazzjon wieħed,
irridu nimxu lkoll flimkien, hemm verament ikollna soċjetà b’saħħitha li tista’
tegħleb kull ostaklu li hemm quddiemha.
X’qed
ikun indikat?
L-aħħar ċifri Ewropej dwar il-kwalità tal-ħajja
tal-Maltin u l-Għawdxin qed jindikaw li f’pajjiżna l-faqar qed ikompli jgħolli
rasu. Fil-fatt, skont l-istess statistika Ewropea, aktar minn 97,000 persuna
rriżultaw li jinsabu f’riskju tal-faqar jew f’esklużjoni soċjali, filwaqt li
aktar minn 82,000 persuna huma f’riskju tal-faqar. Dawn in-numri huma
inkwetanti.
Fil-Floriana f’waqtiet nimilħu affarjiet mhux tas-soltu
li jagħtu indikazzjoni li l-faqar qiegħed fostna. Apparti l-fatt li konxjament
hemm anzjani li jħallsu €700 fix-xahar biex jikru 3 ikmamar, sidien tal-ħwienet
jitkellmu miegħi u jgħiduli li kien hemm żieda fl-ammont ta’ nies li jidħlu
fil-ħanut tagħhom biex jitolbu xi ħaġa tal-flus. Il-Floriana hija lokalità
ċentrali, nies minn kull rokna ta’ Malta jgħaddu minnha, u minn xi ħaġa bħal
din tibda tirrealizza li l-problema fil-Floriana mhux biss tal-Furjaniżi, iżda
tal-Maltin kollha.
Inġib dejjem quddiem għajnejja x-xena li sikwit
timpressjonani fil-Belt Valletta, xena li ħafna jarawha kull filgħodu iżda ma
jirrealizzawx, ix-xena li kulħadd dieħel għax-xogħol, min bil-ġlekk, min bl-uniformi
u min b’ta’ fuqu senduqu... tagħmel kwarta tosserva u tinnota nies li huma
ġejjin minn kull parti tas-soċjetà... mill-aktar fqir... sal-aktar sinjur,
kollha fi triq waħda. U iva kollha ninsabu fi triq waħda biex nagħmlu l-ġid
għal dan in-Nazzjon tagħna, ilkoll għandna r-responsabbiltà li fil-ġudizzji li
ġejjin ‘il quddiem nagħmlu s-sewwa.
Budget
2021
Il-Gvern jagħmel referenza darba waħda biss għall-kelma
"siġar"
Fil-budget li għadu kif tressaq, Robert Abela nesa
kompletament lill-frontliners li kienu u għadhom quddiem nett fil-ġlieda kontra
l-pandemija tal-COVID-19. F'dan il-mument wieħed kien jistenna li tiġi
rikonoxxuta l-ħidma kontinwa tagħhom.
Fil-budget, il-Gvern ma ħabbar l-ebda żvilupp ta’
akkomodazzjoni soċjali... u dwar l-edukazzjoni smajna ftit li xejn.
Fatt pożittiv kien li fil-budget tissemma’ li se jkun
hemm l-iżvilupp tal-ekonomija l-ħadra, madankollu qal ftit li xejn dwar x’inhi
din l-ekonomija l-ħadra għall-Gvern… bil-Gvern Laburista falla li jilħaq
il-miri tal-Unjoni Ewropea biex Malta tipproduċi enerġija sostenibbli u nadifa
f’pajjiżna.
Nesa jindirizza l-problemi li ninsabu fihom u dawk li ser
niffaċċjaw b'mod qawwi fil-futur immedjat.
Biex ma nifthiemx ħażin.... hemm proposti li huma
pożittivi... u oħrajn li ġew irriċiklati minn snin tal-imgħoddi, però għandna
Gvern li qed jibża' jiffaċċja r-realtà.
Fil-budget ma smajna xejn fuq kif se jiġu indirizzati
l-kontijiet tad-dawl u l-ilma. Ma smajna xejn fuq kif se ngħinu 83,000 persuna
f'riskju kbir ta' faqar. Ma smajna xejn fuq pjan olistiku biex in-negozji
Maltin u Għawdxin jibqgħu jlaħħqu mal-isfidi li għandhom.
Inħarsu
‘l quddiem
Pajjiżna jeħtieġ politika ta’ fejda, li l-progess ma
jkunx imkejjel biss fil-bini għoli li naraw jew fin-numri li jitkellmu dwarhom
il-Ministri, imma l-progress irid jitkejjel fil-ġid komuni li verament ikun qed
jasal għand kulħadd.
Issa li l-Partit Nazzjonalista għaddha minn staġun sajfi
ta’ elezzjoni interna u l-eżitu finali twassal, issa trid tissokta l-ħidma u
niffukaw fuq il-ħidma mis-soċjetà, għas-soċjetà Maltija. Il-politika ta’ fejda
u ekwa trid mhux biss tkun fid-dokumenti tagħna iżda bħala Maltin, bħala
politiċi u bħala partitarji rridu nwassluha lin-nies. Irridu niddiskutuha
man-nies, irridu li n-nies iħossu s-sentiment li din il-politika hija tagħhom,
u mhux għalihom. B’hekk biss jirbaħ pajjiżna.
James Aaron Ellul
Minority Leader –
Floriana
jamesaaronellul@gmail.com
Comments
Post a Comment