Ħtieġa li jkun hemm studju ta’ inċentivi għall-Floriana
“Hemm bżonn
jinħoloq bilanċ, in-nies huma dawk li jagħmlu l-lokal”.
Minn stħarriġ li kien sar, il-populazzjoni tal-Floriana
ilha li qabdet it-triq tan-niżla mill-1957, ftit ftit, sakemm waslet għall-popolazzjoni
preżenti, ftit aktar minn 2,000 ruħ (2,032
ċensiment 2019), bl-età medja tal-lokalità hija dik ta’ 60. Il-lokalità
saret anzjana. Fil-lokalità hawn in-nuuqas ta’ familji, u filwaqt li rridu
nieħdu ħsieb l-anzjani tagħna, b’ruħna u b’ġisimna għandna nieħdu ħsieb il-futur
tal-Floriana tagħna.
Fiż-żjarat li nwettaq hija xi ħaġa rari ħafna li niltaqa’
ma’ żgħażagħ tal-età tiegħi, jew tal-anqas ma’ familji bit-tfal. Din hija xi
ħaġa preokupanti, għax meta ngħidu dan, ikun ifisser li l-identità Furjaniża
qed tinqered, u fis-silenzju qed tmut mewta naturali.
“Irid ikun hemm
diskussjoni urġenti, il-Floriana qed tmut mewta naturali”
Biex nieħdu ftit idea tal-problema li ilna ngħixu fiha;
kważi sentejn ilu ċċelebrajna għas-sempliċi fatt li fil-Parroċċa ta’ San Publju
kien hemm 20 tifel u tifla li għamlu l-Ewwel Tqarbina. Dan apparti li uħud minn
dan-numru lanqas biss joqogħdu fil-Floriana. Mill-bqija fis-snin ta’ qabel u
wara, ikollna xorti jekk it-tfal li għamlu l-preċett fil-lokal tela’ għal aktar
minn 10.
Qabel ktibt dan l-artiklu fittixt mhux ftit biex nara
s-sitwazzjoni anki fil-prezzijiet tal-proprjetà fil-lokal. Appartament
ta’ tlett ikmamar fil-Floriana jibda bi prezz ta’ €400,000. Id-daqs
tal-kmamar mhux stupend, anzi nazzarda ngħid li huma kmamar żgħar.
Dan il-prezz huwa għoli u konxji li ħafna minnha
ż-żgħażagħ mhux se naslu biex inħallsu dak l-ammont, apparti li nafu li trid
toħroġ iktar flus biex tirranġa l-post. Allura nistaqsi, x’jista’ jsir biex
tal-anqas proprjetà bħal din tibqa’ tilqa’ r-residenti?
Apparti l-proprjetà għolja, ħafna koppji, speċjalment
dawk kbar fl-età, ħarġu mill-Floriana għax qablilhom ibiegħu l-proprjetà.
Proprjetà li wara kollox bosta drabi tkun imqassma ħażin, b’kamra f’kull sular.
Bilanċ
Hemm realtà oħra, dik li s-sidien tal-kera għollew
il-kera jew inkella ma ġeddewx il-kuntratt lill-Furjaniżi, dan għamluh biex
jieħdu lura l-proprjetajiet tagħhom, uħud minnhom biex ibiegħu lil xi
investitur li jrid ibiddel il-blokka ta’ appartamenti f’boutique hotel. Fatt reali; dawn il-lukandi fil-Floriana faqqsu u
żvillupaw.
Teħdunix ħażin, għax il-kummerċ fil-lokal huwa kruċjali,
madankollu ntilef il-bilanċ. Biex niftiehem aħjar se nħares lejn it-triq ewlenija tal-lokal, Triq Sant’Anna, li
tinsab bi ftit negozji miftuħa u mitluqa għal riħa. Taħt il-loġoġ insibu madum
imkisser, ħajt maħmuġ u minn abjad sar iswed. Taħt il-loġoġ insibu wkoll l-problema
tal-ħamiem fl-irkejjen ta’ kull loġġa. Hawn nistaqsi x’manutenzjoni qed issir?
Jekk qed issir, hija biżejjed? Ir-riżultat jitkellem waħdu – le.
Tajjeb li wkoll intenni u nfaħħar l-investiment li wettqu
diversi negozji u investituri fil-Floriana, sa ċertu punt allaħares ma kienux
huma, madankollu fl-istess nifs nappella fuq il-ħtieġa li jkun hemm bilanċ.
X’inhu jsir biex
din il-problema tingħeleb?
Nemmen li għandna nelliminaw il-kuluri partiġġjani, u
nirrealizzaw din il-problema li hawn fil-Floriana. Nazzarda ngħid li biex
tingħeleb din il-problema mhu qed isir xejn. Il-karba tagħna ilha tippersisti.
Din il-karba kienet waħda mill-ewwel materji li ressaqt biex tkun diskussa meta
ġejt elett fil-Kunsill Lokali tal-Floriana fl-2015. Il-Furjaniżi ninsabu
mwarrba, ilna ninsabu mwarrba, u għalhekk hemm il-ħtieġa li dwar din it-tema
niġbdu lkoll ħabel wieħed.
Nemmen li jrid hemm diskussjoni matura, tissokta fuq dak li
diġà sar. Hemm il-ħtieġa li nibqgħu nippersistu biex din il-problema tkun diskussa
ma’ dawk li tassew għandhom is-saħħa li jbiddlu l-futur tal-lokal.
Din il-problema
ma tinħasx biss fil-Floriana, tinħass fid-distrett kollu u kif ukoll
fil-Kottonera
Fl-aħħar snin kontra qalbi ngħid li kien hemm tentattivi
li din il-problema tkun diskussa quddiem awtoritajiet akbar minn dawk
tal-lokal, dan iżda ma wassal għal imkien. Wassal biss biex ikun hemm artikli
fuq il-midja li l-Floriana qed tingħata l-għajnuna, u fir-realtà, f’dan
l-aspett, l-ebda għajnuna ma ngħatat. Sadanittant, il-Floriana għadha fuq
il-magni tal-mewt, tistenna.
L-ideat u
l-proposti tagħna qed jitwarrbu
Nemmen li rridu
nibdew b’dak li nistgħu nagħmlu llum. Il-Floriana rridu nagħmluha lokalità li
fiha tista’ tgħix, partikolarment għall-anzjani li għadhom residenti
fil-lokal. Irridu nemmnu fl-anzjani tagħna u nieħdu ħsiebhom. Hemm ħafna metodi
biex dan isir; waħda minnhom hija biex il-binjiet tal-Gvern li jinsabu
fil-Floriana, dawk li mhux jintużaw, jingħataw lura lill-Furjaniżi.
Il-PN fl-2015 kien preżenta proposta li binja
governattiva taqleb il-funzjoni għal day
care centre, u dar tal-anzjani ġdida.
Għal din il-proposta qlajna ħafna “prosit”, iżda fuq l-ixkaffa baqgħet. Sa
anki meta preżentajniha bħala mozzjoni fil-Kunsill, ġiet rifjutata u mfarrka.
Fl-2019 għal elezzjoni tal-Kunsill tkellimna fuq
inċentivi li għandhom jingħataw iż-żgħażagħ li jkollhom ir-rieda li jgħixu
fil-Floriana. Kontra qalbi ngħid li ħafna qablu magħna, inkluż persuni ta’
awtorità. S’issa proposti bħal dawn baqgħu fuq l-ixkaffa, u sfortunatament naħseb inħbew.
Fost l-oħrajn proposta oħra tibqa’ li ż-żgħażagħ li jridu
jixtru post fil-Floriana, jingħataw aktar
inċentivi minn kieku se jixtru f’xi lokalità oħra. Il-Floriana trid
issir aktar attirabbli, dan ifisser li nżommu l-identità tagħna, nieħdu ħsieb
dawk li għamluna u ħadu ħsiebna tul is-snin, iżda wkoll nilqgħu fostna familji
ġodda li jsaħħu l-identità tagħna u joħolqu komunità aktar żagħżugħa.
X’saħħa għandhom
il-Kunsilli Lokali?
Punt sagrosant huwa wkoll x’saħħa qed jingħataw
il-politiċi tal-lokal biex iġibu d-differenza meħtieġa? Il-Kunsilli Lokali qed
ikollhom lok li jagħtu l-ideat tagħhom biex iħarsu l-lokal tagħhom? U jekk
il-lok qed jingħata, kemm fir-realtà dawn l-ideat qed ikunu kkunsidrati?
B’fondi limitati, il-Kunsilli ma jistgħux jaħdmu.
Il-Kunsilliera qed ikollna ideat, u ħafna drabi apparti
f’materji drastiċi u jiddispjaċini ngħid bħal punt li semmejt hawn fuq,
minħabba l-partiġġjaniżmu, kważi dejjem naqblu fuq il-proposti li jkun hemm fuq
il-mejda. Madankollu akkost il-qbil bejn il-Kunsilliera kollha xorta waħda wara
nsibu ħajt ta’ sur mill-awtoritajiet biex niplimentaw dak li hu meħtieġ
għal-lokal. Fost l-oħrajn mill-ħafna proposti li l-Furjaniżi taw, hemm din,
pjan ta’ riġenerazzjoni denju għall-Floriana tagħna. Hawn iżda nistaqsi, kemm
se ndumu “nitkarbu” biex il-Kunsilli jingħataw l-għodda biex niplimentaw dak li
hu neċessarju? Kemm se ntennu l-ideat tagħna u jibqgħu jaqgħu f’widnejn torox?
Akkost dan kollu, akkost il-ħajt ta’ sur li nsib
quddiemi, quddiemna, se nibqa’ nagħmel ħilti biex leħen il-Floriana jibqa’ hemm,
il-vuċi tal-Furjaniżi se tibqa’ rappreżentata.
Comments
Post a Comment